Qeydiyyat prosesi 5 Mart 2025 tarixindən başlayacaqdır!

Mahayət Nəbiyev

"Kristal Abşeron" MTK-nın Müşahidə Şurasının sədri Mahayət Nəbiyev 1980-1987-ci illlərdə Azərbaycan Xalq Təsərrüfatı İnstitutunun Mühasibat uçotu fakültəsini bitirmişdir.

1987-ci ildən Tovuz Nəqliyyat Müəssisəsində iqtisadçı, 1988-ci ildən həmin müəssisədə baş mühasib, 1990-1998-ci illərdə isə Tovuz Neft Bazasına baş mühasib kimi fəaliyyət göstərmişdir. O, 2003-cü ildə "Kristal Abşeron" MTK-nı təsis etmişdir və hazırda həmin şirkətin Müşahidə Şurasının sədri olaraq fəaliyyət göstərir. Mahayət Nəbiyevin rəhbərliyi altında "Kristal Abşeron" MTK Azərbaycanın ən böyük və nüfuzlu tikinti şirkətlərindən birinə çevrilmişdir. Şirkət inşaat sektorunda genişmiqyaslı layihələr həyata keçirərək ölkədə memarlıq və tikinti infrastrukturunun inkişafına əhəmiyyətli töhfələr vermişdir.

Mahayət Nəbiyev 2019-cu il 20 noyabr tarixində Azərbaycan Respublikası Prezidentinin Sərəncamı ilə 3-cü dərəcəli "Əmək" ordeni ilə təltif edilmişdir.

Anar Quliyev

Anar Quliyev 1999-cu ildə dövlət qulluğuna başlayaraq müxtəlif dövlət qurumlarında mühüm vəzifələrdə çalışmışdır. 2005-2009-cu illərdə Azərbaycanda İxracın və İnvestisiyaların Təşviqi Fondunda direktor, 2009-2016-cı illərdə “İçərişəhər” Dövlət Tarix-Memarlıq Qoruğu İdarəsində şöbə müdiri, 2016-2018-ci illərdə Mənzil İnşaatı Dövlət Agentliyində aparat rəhbəri, 2018-2019-cu illərdə isə Dövlət Şəhərsalma və Arxitektura Komitəsində aparat rəhbəri olmuşdur.

2019-cu ildə Azərbaycan Respublikası Dövlət Şəhərsalma və Arxitektura Komitəsi sədrinin birinci müavini, Azərbaycan Respublikası Prezidentinin 8 yanvar 2020-ci il tarixli Sərəncamı ilə Azərbaycan Respublikası Dövlət Şəhərsalma və Arxitektura Komitəsinin sədri təyin edilib. 2014-cü ildə “Dövlət qulluğunda fərqlənməyə görə” medalı ilə təltif olunmuşdur.

22 may 2024-cü ildə Azərbaycan Kamandan Oxatma Federasiyasının prezidenti seçilmişdir.

Fərid Safquliyev

Fərid Safquliyev 2006-2010-cu illər ərzində Azərbaycan Dövlət Memarlıq və İnşaat Universitetində Memarlıq ixtisası üzrə bakalvr təhsili almışdır. Hal-hazırda, 2024-cü ildən etibarən İngiltərənin Warwick Universitetində Executive MBA təhsili alır. 2008-2012-ci illərdə müxtəlif şirkətlərdə Memar və Layihə Rəhbəri kimi fəaliyyət göstərmişdir.

2012-2014-cü illərdə MNG Holding-də sahə memarı olaraq çalışmış, 2014-2021-ci illərdə Paşa İnşaat MMC şirkətində İnşaat üzrə Menecer vəzifəsində fəaliyyət göstərmişdir. 2018-ci ildə Farchitects Şirkətlər Qrupu-nu (Farchitects Design Bureau, BRG Construction, Farchitects Hospitality) təsis etmiş və həmin müddətdən etibarən Təsisçi və İdarəedici Direktor vəzifəsində işləyir.

İlqar İsbatov

İlqar İsbatov 1981-ci ildə Azərbaycan Mühəndis-İnşaat İnstitutunun Memarlıq fakültəsinə daxil olmuş, 1984-cü ildə təhsilini Moskva Memarlıq İnstitutunun şəhərsalma fakültəsində davam etdirmişdir. 1987-ci ildə Moskva Memarlıq İnstitutunu memarlıq ixtisası üzrə fərqlənmə diplomu ilə bitirmişdir. Memarlıq üzrə fəlsəfə doktorudur. 1987-ci ildə Bakı Dövlət Layihə İnstitutunun Baş plan emalatxanasında əmək fəaliyyətinə başlamışdır. 1987-1998-ci illərdə Bakı Dövlət Layihə İnstitutunda memar və aparıcı memar vəzifələrində, 1998-2002-ci illərdə “Azərdövlətlayihə” Dövlət Baş Layihə İnstitutunda qrup rəhbəri və layihənin baş memarı vəzifələrində, 2002-2008-ci illərdə “Feniks-AA” Məhdud Məsuliyyətli Cəmiyyətinin direktoru vəzifəsində çalışmışdır.

2008-ci il etibarən Azərbaycan Respublikasının Dövlət Şəhərsalma və Arxitektura Komitəsinin Bakı Dövlət Layihə İnstitutunun direktoru vəzifəsində çalışıb. Azərbaycan Respublikası Prezidentinin 19 iyun 2019-cu il tarixli Sərəncamı ilə İlqar Aydın oğlu İsbatov Azərbaycan Respublikası Dövlət Şəhərsalma və Arxitektura Komitəsi sədrinin müavini vəzifəsinə təyin edilib.

İlqar İsbatov Azərbaycan Respublikası Prezidentinin 9 aprel 2010-cu il tarixli Sərəncamı ilə “Tərəqqi” medalı ilə təltif edilmiş, 10 aprel 2012-ci il tarixli Sərəncamı ilə “Əməkdar Memar” fəxri ada layiq görülmüş, 18 dekabr 2017-ci il tarixli Sərəncamı ilə “Şöhrət ordeni” ilə təltif edilmişdir.

Hüseyin Tonguç Özcan

Hüseyin Tonguç Özcan 1992-ci ildə İstanbul Texniki Universiteti Memarlıq Fakültəsini bitirmişdir. 1993-cü ildə Texniki Yapı A.Ş-də memar olaraq başlamış və 1996-1998-ci illərdə memar Reşit Soley ofisində davam etmişdir.

Bu müddətdən sonra 1998-2010-cu illər arasında sərbəst fəaliyyətə başlamış və bir çox layihələr həyata keçirmişdir. O, müxtəlif disiplinlər və miqyasda layihələrdə məsləhətlər verib və 2010-cu ildən Aslı Mimarlık ofisində direktor vəzifəsində çalışır. Bundan əlavə, müxtəlif miqyasda və keyfiyyətlərdə bir çox mükafatlara malikdir.

Övsət Həmidov

Övsət Həmidov tam ali təhsilini Memarlıq və İnşaat Universitetinin İnşaat mühəndisliyi fakültəsində almışdır. 1978-ci ildən etibarən başladığı əmək fəaliyyəti boyunca bir çox müəssisələrdə inşaat mühəndisi, inşaat meneceri kimi vəzifələri həyata keçirmişdir. O, nüfuzlu inşaat şirkətlərinin rəhbər vəzifələrində çalışarkən respublikanın müxtəlif bölgələrində, o cümlədən ölkə hüdudlarından kənarda çoxsaylı inşaat layihələrinə rəhbərlik etmiş, 4 elmi iş ərsəyə gətirmişdir. Fəaliyyət göstərdiyi müəssisələrdə innovativ inşaat layihələrini, yenilikçi və sürətli inşaat metodlarını və texnologiyalarını tətbiq edərək inşaat sektoruna öz töhfəsini vermişdir.

Hazırda Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin İcraçı direktoru vəzifəsini icra edən Övsət Həmidov 2023-cü ildə Beynəlxalq Ekoenergetika Akademiyasının "İnşaat Mühəndisliyi üzrə Fəlsəfə Doktoru" adına layiq görülmüşdür.

Nəriman Topçibaşev

Nəriman Topçibaşev Azərbaycan Memarlıq və İnşaat Universitetində bakalavr təhsili alıb və MBA dərəcəsinə malikdir. O, 2022-ci ildə Brno Texnologiya Universitetində ikinci magistr dərəcəsini mühəndislik sahəsində tamamlayıb və Harvard Biznes Məktəbində Ümumi Menecment Proqramını bitirib. Logistika və tikinti sahəsində müxtəlif vəzifələrdə 15 ildən çox təcrübəyə malik olan Nəriman Topçibaşev İnşaat Layihələrinin İdarəedilməsi, Biznes İdarəetməsi və Satınalma sahələrində dərin biliklər qazanıb.

2021-ci ildən etibarən “PMD Projects” MMC-nin direktoru vəzifəsində çalışır.

Tural Yusifov

Tural Yusifov 1999-cu ildə Bakı Dövlət Universitetinin Tarix fakültəsinə daxil olmuş, ixtisasca tarixçidir. 2003-cü ilin dekabrında ANS ÇM radiosunda prodüser olaraq işə başlamışdır.

Daha sonra ANS TV, Media FM və 106.3 FM-də çalışmış, 2019-cu ildən etibarən “AvtoStop” verilişini İctimai Radio və İctimai TV-də təqdim edir.

O, həmçinin avtobloger və texnobloger kimi YouTube və sosial mediada aktivdir. 2021-ci ildən “Söhbətgah” podkastının həmmüəllifi kimi fəaliyyət göstərir.

Fəaliyyətinə görə bir sıra mükafatlara layiq görülüb, o cümlədən Netty və Bomba Awards qalibi olmuş, 2020-ci ildə Azərbaycan Prezidentinin Fəxri Fərmanı ilə təltif edilmişdir.

Tural Yusifov, həmçinin "Green Public" adlı startapın həmtəsisçisidir. Bu layihə insanların ağac əkmə təşəbbüslərini dəstəkləyərək, iqlim dəyişikliyi ilə mübarizəyə töhfə verməyi hədəfləyir.

Emin Ağalarov

Emin Ağalarov – Agalarov Development şirkətinin prezidenti, Azərbaycan-Rusiya Biznes Şurasının sədri, Sea Breeze kurort şəhərciyinin sahibi, tikinti və yenidənqurma sahələri üzrə mütəxəssis.

2001-2023-cü illərdə – Crocus Group şirkətində işlədiyi dövrdə ticarət və əyləncə mərkəzlərinin, konsert salonlarının və bir çox başqa obyektlərin tikintisi və idarə olunması ilə məşğul olub. Bu müddət ərzində onun rəhbərliyi ilə Moskva vilayətində ümumi sahəsi 1 milyon kv.m-dən çox olan kommersiya daşınmaz əmlakı təhvil verilib. Eyni zamanda, Emin Ağalarov restoranlar, fitnes klubları, media holdinqi, eləcə də sonradan onun yeni şirkətinin aparıcı layihəsinə çevriləcək Sea Breeze kurort şəhərciyi kimi şəxsi layihələrin də üzərində çalışırdı.

2023-cü ildə Emin Ağalarov Crocus Group-u tərk edərək özünün Agalarov Development şirkətini yaradır.

Sea Breeze kurort şəhərciyi şirkətin ən böyük layihəsidir.

Hazırda 500 hektar sahəni əhatə edən Sea Breeze-də ümumi sahəsi 3 milyon kv.m-dən çox olan kommersiya və yaşayış daşınmaz əmlak layihələri reallaşdırılıb və istifadəyə verilib. Hazırda daha 1,5 milyon kv.m sahədə tikinti işləri həyata keçirilir və 2025-2026-cı illərdə bu layihələr təhvil veriləcək. 17 000 insan artıq “Sea Breeze” rezidentidir. Eyni zamanda, sakinlərin və bura yatırım edən investorların sayı daim artır. Gələcəkdə şəhərcikdə 600 min sakinin yaşayacağı nəzərdə tutulub, layihənin ümumi sahəsi isə süni adalarla birlikdə 1200 hektara çatacaq. Sea Breeze-in tərəfdaşları və investorları Rusiya, Serbiya, İsrail, Avropa və Amerikanın tanınmış development şirkətləri və hotel operatorlarıdır.

2024-cü ilin dekabrında Emin Ağalarov Azərbaycan-Rusiya İşgüzar Şurasınin sədri seçildi. Qurumun fəaliyyəti sahibkarlar arasında biznes dialoqunun genişləndirilməsinə və hər iki ölkənin biznes icmaları üçün tərəfdaşlıq imkanlarının genişləndirilməsinə yönəlib.

Kənan Cəlilov

Kənan Cəlilov 2001–2002-ci illərdə “First Federal Bank of Wisconsin”da Kredit Departamentinin rəhbəri olmuşdur.

2002-ci ildən “AKİ inter” şirkətinin rəhbəri, 2014-cü ildən isə “AKI Inter Group UK” şirkətinin rəhbəridir.

2023-cü ildən Azərbaycan–Özbəkistan Assosiasiyasının İdarə Heyətinin üzvüdür.

Azərbaycan və Böyük Britaniyada fəaliyyət göstərən Azərbaycan–Özbəkistan Ticarət Evinin təsisçisidir.

2023-cü ildən Özbəkistan Respublikasının Azərbaycandakı fəxri konsulu vəzifəsini icra edir.

Bekir Yener Yıldırım

✅ Bekir Yener Yıldırım 1999-cu ildə Ankara Universitetinin Siyasi Elmlər Fakültəsinin İqtisadiyyat ixtisası üzrə məzunu olmuşdur.

✅ 2011–2013-cü illərdə SPK və Borsa İstanbul tərəfindən təsis edilən "Sermaye Piyasası Lisanslama, Sicil və Eğitim Kuruluşu A.Ş."də (SPL) qurucu baş direktor kimi fəaliyyət göstərmişdir.

✅ 2011–2017-ci illərdə isə Türkiyə Qiymətləndirmə Mütəxəssisləri Birliyində (TDUB) İdarə Heyətinin sədri olmuşdur.

✅ Hal-hazırda o, təsisçilərindən biri olduğu Neo Portföy Yönetimi A.Ş.-də İdarə Heyətinin sədri vəzifəsini icra edir

✅ Bekir Yener Yıldırım bir sıra texnoloji startaplar, investisiya şirkətləri və sərmayə fondlarında, eləcə də Oyak Yatırım Ortaklığı A.Ş.-də investisiya komitəsi və idarə heyəti üzvü kimi fəaliyyət göstərir.

Gülçöhrə Məmmədova

✅ Azərbaycan Memarlıq və İnşaat Universitetinin rektoru, memarlıq doktoru, professor, əməkdar memar Gülçöhrə xanım Məmmədova.
✅ 2000–2005-ci il tarixində II çağırış, 2010–2015-ci illərdə Azərbaycan Respublikası IV çağırış Milli Məclisinin deputatı olmuşdur;
✅ 150-dən çox elmi-metodik əsərin, o cümlədən 3 monoqrafiya və 8 kitabın müəllifidir;
✅ Rəhbərliyi ilə 7 elmlər namizədi və 2 elmlər doktoru yetişib;
✅ Qafqaz Albaniyasının və Azərbaycanın erkən xristian memarlığının tədqiqatçısıdır;
✅ Bir çox memarlıq abidəsinin rekonstruksiya layihələrinin müəllifidir;
✅ Beynəlxalq və yerli memarlıq və mühəndislik akademiyalarının üzvüdür;

Rəşad İbrahimov

PMO.az Layihə Düşüncə Mərkəzinin təsisçisi, Layihələrin idarə olunması sahəsində beynəlxalq dərəcəli ekspert (IPMA-A, PMO CP, GPM-b, MBA, EMPM və s), PMO Global Awards müsabiqəsinin münsiflər komitəsinin üzvü, GPM360 Beynəlxalq asessor, Layihə rəhbəri beynəlxalq yarışmasının finalçısı, Layihələrin idarə olunması sahəsində Azərbaycan dövlət standartlarının tərtibatçısıdır.

Rəşad İbrahimov həm ölkə daxilində, həm də beynəlxalq arenada layihələrin idarə olunması sahəsində böyük uğurlar qazanmış peşəkarlardandır. O, Moskva Dövlət Universitetinin dəvət olunan müəllimi, Beynəlxalq Konfrasların spikeridir. Bununla yanaşı Rəşad, ölkəmizə layihələrin idarə olunması sahəsində akkreditasiyaları gətirərək beynəlxalq təcrübələri gənclərimizə əlçatan etmişdir. IPMA ICB4 və GPM Global P5 standartlarını vurğulamaq olar.

Hazırda ölkəmizdə Dayanıqlı Layihə Menecmentini (Green Project Management) sahəsində geniş işlər aparır. Məqalələr və nəşrlər müəllifidir..